zakhm-e-dil zakhm-e-zaban sab sah gae
waqt ke mare hue chup rah gae

aap ki dariya-dili bhi dekh li
kitne dariya aansuon mein bah gae

de rahe the be-amal dars-e-amal
hum bhi sab sun kar samajh kar rah gae

be-zabani bhi zaban ban kar rahi
kuchh na kahna tha magar kuchh kah gae

harf-e-haq bardasht ke qabil na tha
kitni choten thin jo nahaq sah gae

ghaflat-e-imroz ke sailab mein
kal ke sare karname bah gae

'najm' hum nikle jo arz-e-taj se
khusraw-e-be-taj ho kar rah gae