tabassum ho ki aansu chashm-e-tar mein
hamin hum hain zamane ki nazar mein

jahan wusat hui fikr-o-nazar mein
badhe kuchh aur aansu chashm-e-tar mein

mohabbat ke jahan mabad bane hain
hamara khun hai diwar-o-dar mein

ghurur-e-karwan se koi kah de
bahut mare pade hain rahguzar mein

khabar kya khana-barbaadon ki tum ko
khudai hai khudawandi hai ghar mein

shab-e-gham rang lai jate jate
laga di aag daman-e-sahar mein

jafa ho apni had par ya wafa ho
bahut kam hai mohabbat ki nazar mein

ajal aane se pahle kuchh na samjhe
bahut kuchh tha hayat-e-mukhtasar mein