zakhm kyon dil pe lagate ho jo bharne ke nahin
mit gae naqsh wafa ke to ubharne ke nahin

hum ko us auj-e-sharaf tak hai rasai mushkil
aap us masnad-e-nakhwat se utarne ke nahin

aisa gulshan ki siyasat ne kiya hai paband
hum asiran-e-qafas aah bhi karne ke nahin

badh gai kakul-e-hasti ki pareshani aur
jaiye aap se gesu ye sanwarne ke nahin

kitne sailab-e-bala jhel chuke hain hum log
ab kisi shorish-e-amwaj se darne ke nahin