zamana aaya hai be-hijabi ka aam didar-e-yar hoga
sukut tha parda-dar jis ka wo raaz ab aashkar hoga

guzar gaya ab wo daur saqi ki chhup ke pite the pine wale
banega sara jahan mai-khana har koi baada-khwar hoga

kabhi jo aawara-e-junun the wo bastiyon mein aa basenge
barahna-pai wahi rahegi magar naya khar-zar hoga

suna diya gosh muntazir ko hijaz ki khamushi ne aakhir
jo ahd sahraiyon se bandha gaya tha par ustuwar hoga

nikal ke sahra se jis ne ruma ki saltanat ko ulat diya tha
suna hai ye qudsiyon se main ne wo sher phir hoshiyar hoga

kiya mera tazkira jo saqi ne baada-khwaron ki anjuman mein
to pir mai-khana sun ke kahne laga ki munh phat hai khar hoga

dayar maghrib ke rahne walo khuda ki basti dukan nahin hai
khara hai jise tum samajh rahe ho wo ab zar kam-ayar hoga

tumhaari tahzib apne khanjar se aap hi khud-kushi karegi
jo shakh-e-nazuk pe aashiyana banega na-paedar hoga

safina-e-barg-e-gul bana lega qafila mor-e-na-tawan ka
hazar maujon ki ho kashakash magar ye dariya se par hoga

chaman mein lala dikhata phirta hai dagh apna kali kali ko
ye jaanta hai ki is dikhawe se dil jalon mein shumar hoga

jo ek tha ai nigah tu ne hazar kar ke hamein dikhaya
yahi agar kaifiyat hai teri to phir kise e'tibar hoga

kaha jo qamri se main ne ek din yahan ke aazad pagal hain
to ghunche kahne lage hamare chaman ka ye raazdar hoga

khuda ke aashiq to hain hazaron banon mein phirte hain mare mare
main us ka banda banunga jis ko khuda ke bandon se pyar hoga

ye rasm barham fana hai ai dil gunah hai jumbish nazar bhi
rahegi kya aabru hamari jo tu yahan be-qarar hoga

main zulmat-e-shab mein le ke niklunga apne darmanda karwan ko
shah nishan hogi aah meri nafas mera shoala bar hoga

nahin hai ghair az numud kuchh bhi jo muddaa teri zindagi ka
tu ek nafas mein jahan se mitna tujhe misal sharar hoga

na puchh iqbaal ka thikana abhi wahi kaifiyat hai us ki
kahin sar-e-rah-guzar baitha sitam-kash intizar hoga