zamin tut gai aasman tut gaya
laga jo sang-e-haqiqat guman tut gaya

abhi hayat ka irfan hone wala tha
kisi ke paon ki aahat se dhyan tut gaya

nahin sanbhaal saki hum se nishani-e-tahzib
chilamchi tut gai pan-dan tut gaya

main jab tha aaina mahfuz tha zamane mein
ajib baat hai ban kar chatan tut gaya

khushi ki baat ki khushbu bikhar gai har-su
alam ki baat naya itr-dan tut gaya

rawan thi naw meri jis ke dam se ai 'meraj'
usi hawa se mera baadban tut gaya