zanjir ne ki jumbish wahshat ne li angdai
shayad ki bahaar aai shayad ki bahaar aai

yak-rangi-o-yaksui yakjihati-o-yakjai
kahte hain junun jis ko hai asl mein danai

itna to bata ai dil ye kaun si manzil hai
ab khud hi tamasha hun aur khud hi tamashai

diwana hun main be-shak diwana magar kis ka
puchhe to koi un se ye kis ki hai ruswai

mumkin jo nahin tera duniya mein hamein milna
mahshar hi mein mil lenge tujh se tere shaidai

ye saqi-e-mehwish hai wo jam-e-mai-e-rangin
hai aur kahan jannat jannat ke tamannai

be-wajh se taskin hai kyun aaj 'sahar' mujh ko
kaun aaya hai ghar mere wo hain ki qaza aai