zara socha to kya kya zehn se manzar nikal aae
mere ehsas ke kuchh khandaron se ghar nikal aae

lagen dene sabaq wo phir parindon ko udanon ka
zara se shahr mein jab chintiyon ke par nikal aae

ye aalam hai ki jab bhi ghar mein kuchh dhundne baitha
purane kaghazon se yaad ke manzar nikal aae

laga jab yun ki uktane laga hai dil ujalon se
use mahfil se us ki alwidaa kah kar nikal aae

dikhai de kabhi ye moajiza bhi mujh ko ulfat mein
kisi shab chand ban kar wo meri chhat par nikal aae

mile hain zakhm jab se 'shokh' wo gulshan se barta hai
bharosa kuchh nahin kis phul se patthar nikal aae