zard rukhsaron mein dhal jaane ka fan
phulon ko aata hai kumhlane ka fan

aadmi ek shahr ki buniyaad hai
jaanta hai panw phailane ka fan

kya hue jo gul khilati thi saba
kya hua wo khushbu phailane ka fan

ghere rahti hain hazar aankhen use
jis ko aata hai nazar aane ka fan

rah ka patthar hun mujh se puchhiye
thokaron par thokaren khane ka fan

jaanta hai koi koi aadmi
aadmi ko kaam mein lane ka fan

shahr mein yusuf ko tanha kar gaya
apne apne chehre chamkane ka fan