dosti par yaqin la-mahdud
ho chuka ab wo silsila mahdud

hum ne jo bhi kaha kaha mahdud
sab ko achchha laga ki tha mahdud

shairi mukhtasar-nawisi hai
warna lawa tha dil mein la-mahdud

us ko dariya mein ja ke milna tha
ek qatra tha rah gaya mahdud

chahe jitna bhi ho wasia magar
phir bhi hota hai daera mahdud

apna apna nasib hai ai dost
warna sab kuchh yahan hai la-mahdud

rahnuma jab se main bana apna
na raha koi rasta mahdud

us ko kuze mein band kar dala
ab to dariya bhi ho chuka mahdud

dastaras mein 'farid' tha sab ki
jaane ab kyon wo ho gaya mahdud