zat ki sair pe niklun meri himmat hi nahin
is bayaban se guzarne ki jasarat hi nahin

zindagi main ne qanaat ka hunar sikh liya
ab tere naz uthane ki zarurat hi nahin

koi shikwa na shikayat na sitam hai na jafa
ek muddat se teri hum pe inayat hi nahin

jab bhi milte hain chamak uthti hain aankhen un ki
aur dawa hai unhen hum se mohabbat hi nahin

dil to kya chiz hai patthar bhi pighal jae magar
jazba-e-ishq mein tere wo hararat hi nahin

apne ashkon se bana dete bayaban ko chaman
kya karen hum ko to rone ki ijazat hi nahin

mo'atabar bhi wahi arbab-e-nazar mein thahri
jis kahani mein koi harf-e-sadaqat hi nahin

us ki yaad aai hai mat chhed mujhe baad-e-saba
tujh se phir baat karungi abhi fursat hi nahin

gulshan-e-dil pe khizaon ka tasallut hai 'nigar'
koi khwahish koi arman koi chahat hi nahin