zehn-o-dil mein pichhli shab ki dastan to saf ho
jhilmilaenge sitare aasman to saf ho

ghair ko to chhod us ka jo bhi ho radd-e-amal
baat lekin tere mere darmiyan to saf ho

rah-rawi jari rahe be-shak ho manzil ke khilaf
karwan par hukm mir-e-karwan to saf ho

dil samajh lega ishaara aap kar ke dekhiye
shart hai lekin nigahon ki zaban to saf ho

kis tarah aae nazar 'bebak' ab zakhm-e-jigar
rauzan-e-dil wa ho chashm-e-khun-chakan to saf ho