zikr shabbir se nikal aaya
khun tahrir se nikal aaya

hai gharibi ki fasl-e-gul ki samar
chhat ke shahtir se nikal aaya

raqs mein yun lage mujhe jaise
jism zanjir se nikal aaya

meri qismat to dekhiye sahab
khwab tabir se nikal aaya

le ke apni kaman-o-tegh-o-sipar
saya-e-pir se nikal aaya

uzr-e-takhrib-gar pas-e-parda
shauq-e-tamir se nikal aaya

meri tanhai bantne 'rahat'
aks taswir se nikal aaya