zinda hona aur na jina tum hi kaho kya mumkin hai
khud ko kar dena an-dekha tum hi kaho kya mumkin hai

aas ki lau aankhon mein jalae ladti jaun andheron se
raat hai raat ka ho na sawera tum hi kaho kya mumkin hai

tez hawa ka ek jhonka shoalon mein badal ke rakh dega
chingari ko dabae rakhna tum hi kaho kya mumkin hai

jhut ke panw nahin hote ek roz to pakad jaega
sach ke hath kabhi nahin aana tum hi kaho kya mumkin hai

kis kis ko chup koi kare hain jitne munh hain utni baaten
aag lage aur dhuan na uthna tum hi kaho kya mumkin hai

mumkin hai khul kar na kaha ho us se main ne magar 'bilqis'
us jaise ka kuchh na samajhna tum hi kaho kya mumkin hai