zindagi bhar shikast khai hai
ab mohabbat samajh mein aai hai

dil ka milna khushi ki baat sahi
ye khushi kis ko ras aai hai

gar hamein hai junun-e-dida-wari
un ko kyun shauq-e-khud-numai hai

hum jidhar hain faqat hai nam-e-khuda
wo jidhar hain udhar khudai hai

ek mulaqat mein hai ye aalam
jaise barson ki aashnai hai

baat tark-e-ana tak aa pahunchi
ghairat-e-dil teri duhai hai

'bazm' samjhe the sarsari jis ko
wo mulaqat rang lai hai