zindagi gulshan mein bhi dushwar hai tere baghair
is chaman ka phul bhi ek khar hai tere baghair

zindagani ishq ki nakaamiyon mein sarf ki
zindagi ka lutf bhi dushwar hai tere baghair

teri surat samne hoti to main kahta ghazal
mujh pe zauq-e-shairi ek bar hai tere baghair

saqiya jab tu nahin main ne bhi chhodi mai-kashi
mai-kade se mai se bhi inkar hai tere baghair

kis ki surat dekh kar pae qarar-o-chain dil
id bhi 'siddiq' ki be-kar hai tere baghair