zindagi hosh ki duniya se juda lagti hai
jab kisi daman-e-gul-ru ki hawa lagti hai

shukriya teri nawazish ka magar kya kahiye
ye nawazish bhi to ek tarz-e-jafa lagti hai

is chaman-zar-e-mohabbbat mein hamein ai hamdam
apni hasti bhi kisi gul ki dua lagti hai

hum ko be-raunaqi-e-sham-e-tamanna taslim
aap ki subh bhi mange ka diya lagti hai

kya qayamat hai ki be-rah-rawi bhi hum ko
wajh-e-shaistagi-e-fikr-o-nawa lagti hai

mujh se milti hai to katra ke nikal jati hai
har khushi chashm-e-taghaful ki ada lagti hai

ho jo manus tabassum ki kiran se 'nazim'
dil ki har fikr ujalon ki nawa lagti hai