zindagi ke mathe par aai jab shikan yaro
sarfarosh uthte hain bandh kar kafan yaro

shakh sa badan yaro phul sa dahan yaro
koi mujh se puchhe to us ka bankpan yaro

saz-e-asr-e-hazir par naghma-e-kuhan yaro
hosh mein ab aa jao mere ham-watan yaro

gardish-e-zamana bhi rahat-e-zamana bhi
rabt-e-shoala-o-shabnam dil ki anjuman yaro

qatra-qatra khun-e-dil aankh se tapakta hai
aaj nashtar-e-gham ki badh gai chubhan yaro

ye jo 'dard' hai rukh par ashk-e-khun ki lali hai
bas gaya hai aankhon mein ek gul-badan yaro