zindagi kyun udas hai ai dost
maut kya aas-pas hai ai dost

wo bhi maslub ho na jae kahin
wo bada haq-shanas hai ai dost

tha jo 'ghaalib'-shikan zamane mein
wo 'yagana' hi 'yas' hai ai dost

ye zamana bhi kya qayamat hai
har taraf ek hiras hai ai dost

hai jo har dil mein ek khudi ka surur
zindagi ki asas hai ai dost

dur rah kar bhi mujh se dur nahin
wo sada dil ke pas hai ai dost

ho ziyarat mujhe madine ki
rab se ye iltimas hai ai dost