zindagi nam hai jis chiz ka kya hoti hai
chalti phirti ye zamane ki hawa hoti hai

sair duniya ki na kuchh yaad-e-khuda hoti hai
umr inhin jhagdon mein taraj-e-fana hoti hai

ruh jab qalib-e-khaki se juda hoti hai
kis ko malum kahan jati hai kya hoti hai

fikr-e-duniya se siwa ho jise uqba ka khayal
wo tabiat hi zamane se juda hoti hai

dil-e-pur-gham abhi ban jae dawa-e-taskin
wo nazar dal jo manus-e-wafa hoti hai

sadiqul-qaul ki pahchan yahi hai ai 'naz'
dil mein dar hota hai aankhon mein haya hoti hai