zindagi ye sakht-jaani aur hai
hae apni na-tawani aur hai

kya mujhe un ki duaen lag gain
yani kuchh din sargirani aur hai

barha rote rahe hain zar zar
par ye ab ki nauha-khwani aur hai

hum ne jheli hain bahut si aafaten
ye bala-e-asmani aur hai

hain tumhaari zindagi mein raunaqen
par hamari zindagani aur hai

waqt-e-rukhsat thartharaate lab tere
mujh se kahte hain kahani aur hai