zist yun gham se ham-aghosh hui jati hai
ishrat-e-rafta faramosh hui jati hai

us ne ek bar pukara tha harim-e-dil se
zindagani hama-tan-gosh hui jati hai

tum na uttho mere pahlu se khudara dekho
kaenat aankhon se ru-posh hui jati hai

wo udhar mujh se khafa ho ke uthe hain to idhar
nabz-e-dil dekhiye khamosh hui jati hai

kasrat-e-gham hai ki takmil-e-junun hai 'salman'
yaad bhi un ki faramosh hui jati hai