us ne mujhe salam kiya lam ke baghair
ye baddua thi mujh ko mere nam ke baghair

har roz man ka chehra mein takta hun pyar se
har roz haj main karta hun ehram ke baghair

ek main hun meri aankh mein aansu hain subh subh
duniya diye jalati nahin sham ke baghair

saqi ye teri mast-nigahi ka faiz hai
pita hun main sharab magar jam ke baghair

'gilani' aise dost ka be-dam hun ghulam
mujh se jo milne aae kisi kaam ke baghair