zor us par hai na haalat pe qabu yaro
jaane ab kya ho mulaqat ka pahlu yaro

kitne zakhmon ke tabassum ka pata dete hain
meri palkon pe sulagte hue jugnu yaro

zakhm is taur se mahke hain sar-e-sham-e-firaq
dur tak phail gai dard ki khushbu yaro

kitne khwabon ko nichoda hai to un aankhon se
aaj tapka hai ye jalta hua aansu yaro

donon aalam meri banhon mein simat aae the
raat shanon pe pareshan the wo gesu yaro

log kahte the na pighlega wo patthar 'shahid'
tum ne dekha mere ashaar ka jadu yaro