jis qadar duniya mein makhluqat hai
sab se ashraf aadmi ki zat hai

is ki paidaish mein hai ulfat ka raaz
is ki hasti par hai khud khaliq ko naz

is ki khatir kul jahan paida hua
ye zamin ye aasman paida hua

aql ka jauhar ise bakhsha gaya
ilm ka zewar ise bakhsha gaya

is ke sar mein hai nihan aisa dimagh
jis mein raushan hai liyaqat ka charagh

soch kar har kaam kar sakta hai ye
sher ko bhi ram kar sakta hai ye

ye safai se chatanen tod de
apni danai se dariya mod de

man-chala hai is ki himmat hai buland
dal sakta hai sitaron par kamand

is ko khatron ki nahin parwa zara
aag mein kuda ye suli par chadha

is ke har andaz mein eajaz hai
arsh tak is nur ki parwaz hai

is ki baaton mein ajab tasir hai
khak ka putla nahin iksir hai

ye agar neki ke zine par chadhe
ek din sare farishton se badhe

aur agar isyan ki daldal mein phanse
is ka darja kam ho haiwanat se

ye kabhi rui se badh kar narm hai
ye kabhi suraj se badh kar garm hai

ek haalat par nahin is ka mizaj
har zamane mein badalta hai riwaj

aur tha pahle ye ab kuchh aur hai
aae din is ka nirala taur hai

is ne behad rup badle aaj tak
is ki tadbiron se hairan hai falak

doctor tajir professor wakil
in ka hona hai taraqqi ki dalil

is ke pahlu mein wo dil maujud hai
jo bhadakne mein nira barud hai

rail gadi radio motor jahaz
is ki ijadon ka qissa hai daraaz

dast-kari mein bada mashshaq hai
jiddaton ka har ghadi mushtaq hai

khol aankhen jang ki raftar dekh
dekh is ke khaufnak auzar dekh

ye kahin hakim kahin mahkum hai
ye kahin zalim kahin mazlum hai

aadmi jab ghair ke aage jhuka
aadamiyyat se bhatakta hi gaya

aadmi milna bahut dushwar hai
khud khuda ko aadmi darkar hai

pyare bachcho aadmi ban kar raho
har kisi ke sath hamdardi karo

sach agar puchho to bas wo mard hai
jis ke dil mein dusron ka dard hai

'faiz' pahunchata nahin jo aadmi
us ko apni zat se hai dushmani

us ko apni zat se hai dushmani