ek nae daur ka aaghaz hua
dar-e-ashufta-sari baz hua

na-shakebai ki chalti hai hawa
be-yaqini ki ubharti hai sada

aae mandlate hue abr-e-shuur
liye hamrah khayalat-e-jasur

muntazir shauq hai bechain nidhaal
jaane kab mausam-e-baran aae

hae tabdili-e-mausam ki umid
rang lae hai ba-tadrij junun

tutne wala hai har ek fusun
han khudaon ki khudai ka fusun

kaj-dimaghon ki badai ka fusun
aa nae daur tujhe chum to lun