dam-ba-dam apni hi nazron se utarte hue log
hain ajab log ye har sans mein marte hue log

yaad-e-mazi ke kharabon mein thithurte hue log
khisht-e-parina ki manind bikharte hue log

lazzat-e-zist se khaif gham-e-hasti se khafa
apne jazbaat se har lahza mukarte hue log

jalwa-e-ru-e-haqiqat se nigahen phere
apne auham se sargoshiyan karte hue log

in ki aankhon mein dhundalkon ke siwa kuchh bhi nahin
khwab kya dekhenge tabir se darte hue log