ye ghanimat hai ki wo khwab adhure hi rahe
wo jo ek umr talak

meri be-khwab nigahon ka udate the mazaq
wo jinhen sada-dili samjhi junun ka tiryak

jo kabhi baam pe chamke
kabhi dar se jhanke

kabhi rauzan kabhi chilman se numudar hue
jo kabhi zulf ka jadu

to kabhi shola-e-rukhsar hue
jo kabhi chashm-e-fusun-kar hue

khol kar band dariche chaman-arai ki
aarzu bante gae jo gham-e-tanhai ki

ye ghanimat hai ki wo khwab adhure hi rahe
marg-e-tabir ka unwan na bane

warna ye tohmat-e-ruswai kahan se aati
mere fan mein ye masihai kahan se aati