kahne ko to yun kah dete hain bhaarat ko agar gadi kahiye
to hindu aur musalman hain is gadi hi ke do pahiye

ya madar-e-hind ki aankhon ke hindu muslim do tare hain
ho jaen agar ye shir-o-shakar phir kya hai ware-nyare hain

jab baat ye hai to kyun donon ek ek ko girana chahte hain
kyun qasr-e-qaumiyyat ki bina ye donon dhana chahte hain

gadi jo chalana chahte ho pahiya koi na-hamwar na ho
gar did ka lutf uthana hai to aankh koi be-kar na ho

kya ham-sayon se lad padna quran sharif mein aaya hai
kya ham-sayon se shar karna wedon ne kahin batlaya hai

phir nahaq kyun apni quwwat ko hum din-raat ganwate hain
khud ladte hain dukh bharte hain jo ghair hain un ko hansate hain

yun aapas mein ladte ladte kya jaaniye kya ho jaenge
ek din aisa aa jaega hum donon fana ho jaenge

achchha ye baat batae koi ab tak lad kar kya paya hai
in roz ke qisson jhagdon se kya hath hamare aaya hai

hum aazadi tak kho baithe is aapas hi ki ladai se
bhaarat ki naw dubo baithe is aapas hi ki ladai se

is aapas hi ki ladai se iflas se hum do chaar hue
is aapas hi ki ladai se hum aise zalil-o-khwar hue

daulat jo sharaf ka bais thi ab sat samundar par gai
is aapas hi ki ladai se ek bar nahin sau bar gai

be-koshish kuchh bhi mil jae is dahr mein ye dastur nahin
han dil se koshish kar dalen to achchhe din kuchh dur nahin

ho meri tamanna par 'nayyar' qudrat ki taraf se sad kahin
allah kare wo din aae ye mulk bhi ho aazad kahin