aaj unhon ne ailan kar hi diya
dekho!

hum ne tumhaari sab ki sab quwwaton ka faisla kiya tha
qil-o-qal ki gunjaish baqi nahin hai

tumhaare iqrar-name hamare pas mahfuz hain
tum se pahle walon ki khata yahi thi

ki unhen,
apni naf ke niche sarsarahat ka ehsas

kuchh ziyaada hi ho chala tha
unhen shahr-badar kar diya gaya

un ke pachhtawe aur gidgidahaten
aaj bhi hamare kanon mein mahfuz hain

tumhein itni chhut di hi kyun jae
ki tum

kal hamare muqable par utar aao
hum tumhein hoshiyar kiye dete hain

diwaren phalangne wale
itab se bach nahin sakte

aqd-namon par tumhaare dastakhat
tumhaari na-muradi ka khula e'tiraf hain

is ke baghair
hamari haram-sara mein

dakhil hone ke ijazat-name
tumhein mil bhi kaise sakte the

is se pahle ki hamare najibut-tarafain shajre mashkuk ho jaen
aur hamare hasab-nasab par aanch aa jae

ham!
tum se pahle gulu-khalasi ka rasta dhund nikalenge!!