inhi do se aabaad har ek ka ghar hai
kamana hai fan aur bachana hunar hai

ye baat aaj hi sochna hai zaruri
kise hai khabar aane wale dinon ki

bure waqt mein kaam aaenge aksar
rakhoge agar chaar paise bacha kar

bachat hi se mil-jul ke banti hai daulat
bachat hi se badhti hai mulkon ki taqat

ye faslen ye bazar ye kar-khane
bachat ne sanware hain bigde zamane

zara ja ke ghar dekh lo chiyuntiyon ka
wo danon ka karti hain kaise zakhira

yunhi qatra qatra samundar banega
yunhi lamha lamha muqaddar banega

bachat ki jo bachpan se daloge aadat
bade ho ke paoge duniya mein rahat