main hun kamzor meri azm ki taqat de de
mere allah mujhe sabr ki daulat de de

haq ka daman na chhute jhut se main dur rahun
mujh ko sarkar-e-do-alam ki itaat de de

mal-o-zar kharch ho bewaon yatimon pe mera
mere allah mujhe aisi sakhawat de de

har nazar mein tere mahbub ka jalwa ho nihan
khaliq-e-kaun-o-makan aisi basirat de de

jo qadam utthe teri rah mein wo utthe mera
tu mujhe jazba-e-kaamil wo shujaat de de

main rahun dur burai se amal nek karun
jo hai ashab ki allah wo sirat de de

mera har kaam ho insan ki bhalai ke liye
khidmat-e-khalq karun aisi saadat de de

mere allah meri itni dua hai tujh se
mujh ko ashab-e-mohammad ki mohabbat de de