suno madar-e-hind ke nau-nihaalo
sadaqat pe gardan kata lene walo

utho khwab-e-ghaflat mita lo mita lo
kamar-basta ho jao himmat badha lo

tumhein gam-e-himmat badhana padega
watan ka muqaddar jagana padega

taraqqi ka bhaarat ki naghma suna do
mohabbat ki ganga dilon mein baha do

jo khufta hain muddat se un ko jaga do
sadaqat ka didon ki danka baja do

karo jald sairab ujde chaman ko
lagen chaar chand aaj apne watan ko

pade hain kahin din ki jaan ke lale
kahin dil hilate hain bekas ke nale

hue hain kahin nim-jaan bhole bhaale
musibat ke chakkar mein hain hind wale

chala hai kisi ke kaleje pe nashtar
dhuan aah ka hai kisi ke labon par

bharosa zamin ka na charkh-e-kuhan ka
tawakkul hai parmatma par watan ka

nazara hai gulzar kishwar mein ban ka
hua khar har phul apne chaman ka

na chhodo magar hausla sher mardo
utho beda manjhdar se par kar do

shikayat ka karna nahin yaad tum ko
nahin aadat-e-shor-o-fariyaad tum ko

sitam-gar kare lakh barbaad tum ko
kare gardish-e-charkh nashad tum ko

zara kan par jun na renge tumhaare
chalen gardanon pe jo khanjar do dhaare

sada zulm ki aa rahi hai jahan se
ki zahir hain be-dad pir-o-jawan se

tapakti hain gar hasraten ab yahan se
lapakte hain shoale sitam ke wahan se

magar tum ho is pe bhi mahw-e-qanaat
qanaat nahin ye hai zof-o-kasalat