zist ka tarjuman hai mera kirshn
yani jaan-e-jahan hai mera kirshn

hai wahi malik-e-fana-o-baqa
wali-e-do-jahan hai mera kirshn

aap jada hai aap manzil hai
yani manzil-nishan hai mera kirshn

meri manzil qarib-tar kar di
ru-kash-e-rahbaran hai mera kirshn

bagh-e-iman ko tazgi bakhshi
nazish-e-gulsitan hai mera kirshn

meri duniya sanwar di us ne
meri ruh-e-rawan hai mera kirshn

fikr-e-duniya-o-aqibat hi nahin
zamin-e-do-jahan hai mera kirshn