bolo kaun bahadur hai
bolo kaun bahadur hai

sheron ko jo mar girae
bade badon se jo takrae

ya wo jo har ek aalam mein
ghussa aae to pi jae

bolo kaun bahadur hai
bolo kaun bahadur hai

nafs ka apne wo hakim ho
ya nafs us ka hi hakim ho

itraata ho apni khata par
ya wo khataon par nadim ho

bolo kaun bahadur hai
bolo kaun bahadur hai

girton ko jo thokar mare
ya jo girton ko bhi sambhaale

zulm pe jo khamosh rahe ya
zulm se mazlumon ko bacha le

bolo kaun bahadur hai
bolo kaun bahadur hai

taqat par jo ho maghrur
ya akhlaq ho jis ka nur

sach kahna sach sunna jaane
ya in sab se ho wo dur

bolo kaun bahadur hai
bolo kaun bahadur hai

sachchai ki rah chale jo
ya jo har pal khud ko badle

thokar se bhi sabaq na le jo
ya jo gir jae to sambhle

bolo kaun bahadur hai
bolo kaun bahadur hai