1
wo azal se apne azim chaak pe

mumkinat ke inkishaf mein mahw hai
falak-o-zamin mah-o-aftab-o-nujum kohna karishme us ke kamal ke

abhi is ki jiddat-e-be-panah ko tarah-e-nau ki talash hai
abhi arsh-o-farsh ke na-shunida shamail us ki nazar mein hain

abhi mawara-e-khayal-o-fikr-e-masail us ki nazar mein hain
kurra-e-zamin ko ye fakhr hai

ki ye khak khaliq-e-khaliqan ko aziz hai
yahin sans leti hayat jalwa-numa hui

isi arz-e-khak ko armughan-e-numu mila
yahan zindagi ke wo rang hain wo tariq hain

ki na un ka koi shumar hai na hisab hai
inhi paikaron mein hai ja-ba-ja wo tilism-e-aks-e-jamal bhi

jise dekh lene se chashm-o-dil hama-hairat-o-hama-be-khudi
kahin konpalon ko nikhaarta hai wo lazzat-e-nam-e-shakh se

kahin mu-qalam se sanwarta hai gulon mein rang nae nae
kabhi bakhsha hai dilon ko dard ki jaan-gudaz latafaten

koi rang ho koi rup ho
koi shakl koi mizaj ho

sabhi us ke chaak se aae hain
2

ye sari baaten sach hi sahi
ye sare guman durust sahi

par ye to kaho
qadmon tale raunde patton ki aawaz suni hai tum ne kabhi

murjhae hue phulon se kabhi biti hui rut ki baat hui
kabhi khauf-zada nakhchiron ki aankhon mein jhank ke dekha hai

kabhi dukhte dilon ki us dhadkan us dahshat mein bhi sharik hue
jo hote hue bhi na hone ke ehsas se paida hoti hai

phati purani shaklon wale
ye apahij ye mazur zaif

ye tute phute khilaune bhi
usi chaak se aae hain ki nahin

kal jin ki hayat thi barq-asa
paiwand-e-khas-o-khashak hue

jinhen dekh ke aankhen raushan thin
pinhan pas-e-parda-e-khak hue

wo naqsh-gar-e-kaamil hai to phir
jo naqsh-e-jamil banata hai

jo dard dilon mein jagata hai
use ghaarat kyun kar deta hai

fankar-e-azal ko kya apne kisi naqsh pe itminan nahin
3

aadmi-zade kisi rang kisi naqsh ka paband na ho
zist thahra hua jouhad nahin mawwaj-o-rawan dariya hai

tu hai ek thahre hue pal mein talabgar-e-dawam
ye dawam asl mein hai be-hisi-e-marg ka nam

aadmi-zade tere rishte hain baadal ki tarah
ghir ke aate hain baraste hain guzar jate hain

yun bhi hota hai ki kuchh der thahar jate hain
yun bhi hota hai ki bin barse bikhar jate hain

tu kisi rishte kisi abr ka paband na ho
tu ki hai tute khilaune ke liye girya-kunan

dekh ye khak ke paikar to faqat shakl badal lete hain
inhi tute hue bekar khilaunon ki ye mitti phir se

zist ke chalte hue chaak ke kaam aati hai
phir nae rup mein dhal jati hai

jaane walon ke liye
mitte rangon ke liye tute khilaunon ke liye

tera har nauha baja hai lekin
aane walon ka banaw bhi to dekh

taza konpal ki nazakat mein tanaw bhi to dekh
ki wo fankar-e-azal

aaj bhi apne usi chaak pe hai