gulshan mein rut nai hai
har samt be-khudi hai

har gul pe tazgi hai
masrur zindagi hai

sar-chashma-e-khushi hai
chhabbis january hai

har su khushi hai chhai
sab ne murad pai

phir january ye aai
yaum-e-surur lai

saat murad ki hai
chhabbis january hai

aankhon mein rang-e-nau hai
baatil se jang-e-nau hai

saz aur chang-e-nau hai
har dar pe sang-e-nau hai

pur kaif zindagi hai
chhabbis january hai

main gunguna raha hun
masti mein ga raha hun

khushiyan mana raha hun
aalam pe chha raha hun

dil mahw-e-be-khudi hai
chhabbis january hai

hindostan khush hai
har pasban khush hai

har nau-jawan khush hai
sara jahan khush hai

ek josh-e-sarmadi hai
chhabbis january hai