dadi ka tha daulat-khana
ghar kya tha ek jannat-khana

bachpan mera guzra is mein
be-shak tha wo shafqat-khana

bawarchi-khane mein is ke
lakdi ka tha neamat-khana

khane is mein itne sare
samjho jaise hairat-khana

khane pine ki chizon ka
lagta tha wo barakat-khana

shirini bhi namkini bhi
har khana tha lazzat-khana

dudh is mein aur lassi us mein
aur is mein ek sharbat-khana

phal aur sabzi ki khushbu se
har dam jaise nikhat-khana

yaad aate hain din bachpan ke
aur dadi ka neamat-hana