umr ki dhup dhalne wali hai
zindagi sham karne wali hai

koi aawaz de raha hai mujhe
sath chalne ko kah raha hai mujhe

jaana sab ko hai jaana hi hoga
dar nahin ye ki jaane kya hoga

kis tarah ruh badan ko chhodegi
is ka maskan bhala kahan hoga

jaane kaisa naya makan hoga
gor mein jaane kaisi guzregi

reza reza badan jo bikhrega
dar nahin ye ki jaane kya hoga

jaisi karni hai waisa katungi
nekiyon par hai e'tibar mujhe

apne aamal par bharosa hai
dar to bilkul nahin hai kya hoga

dar to bas sirf itna hai
dur pardes hain mere pyare

waqt-e-rukhsat wo aa sakenge kya