musafiron se kaho aasman ko mat dekhen
na koi abr ka tukda

na koi tar-e-shafaq
guzashta sham ka uttha hua wo gard-o-ghubar

abhi talak hain fazaen usi se aaluda
wo ek aag kabhi zad-e-rah thi apna

jahan qayam kiya tha
wahin pe chhod aae

to ahl-e-qafila
ab dastan-go se kaho

koi riwayat-e-kuhna koi hikayat-e-nau
jo khun ko sard kare

aur soch bikhra de
ki aaise waqt mein khamoshiyan to thik nahin