diwali ke dip jale hain
yar se milne yar chale hain

chaaron jaanib dhum-dhadaka
chhote rocket aur patakha

ghar mein phul-jhadiyan chhute
man hi man mein laddu phute

dip jale hain ghar aangan mein
ujyara ho jae man mein

apnon ki to baat alag hai
aaj to sare ghair bhale hain

diwali ke dip jale hain
ram ki jai-jai-kar hui hai

rawan ki jo haar hui hai
sachche ka har bol hai baala

jhute ka munh hoga kala
sachchai ka danka baje

sach ke sar par sahra saje
jhut ki lanka khak bana ke

ram ayodhya laut chale hain
diwali ke dip jale hain

hindu muslim sikh isai
mil kar khaen yar mithai

bhul ke shikwe aur gile sab
hanste gate aaj mile sab

kahne ko har dharm juda hai
lekin sab ka ek khuda hai

ek mati ke putle 'haidar'
is sanche mein khub dhale hain

diwali ke dip jale hain