hujum se bach ke
sune sune khamosh raston pe chalne wala

wo us zamane mein pa-pyaada musafirat ka amin
rasta badal chuka hai

nazar abas us ka naqsh
manus raston par

talash kar ke chaunkti hai
mujhe khabar hai wo ja chuka hai

wo ja-ba-ja rah mein ubharti shabih us ki
nigah ki tishnagi ne misl-e-sarab ijad kar rakhi hai

jab aakhiri bar us ko dekha
to us ka rasta badal chuka tha

har ek tariqa badal chuka tha
hujum se bach ke chalne wala

hujum ke sath chal raha tha
jab aakhiri bar us ko dekha

to umr bhar ki musafirat ke khilaf
us ko sawar dekha

aur us ke pahlu mein pa-pyaada hujum ko sogwar dekha