chhin kar mujh se meri jaan mere dil ka qarar
tu ne gul kar hi diye meri umidon ke charagh

tu ne kyon ghol diya zahr meri rag rag mein
tu ne kyon tod diye meri mohabbat ke ayagh

mujh ko malum tha qatil hai tu armanon ki
dil-e-majruh ke armanon se tu khelegi

dil nahin hai tere sine mein koi patthar hai
dil se uthte hue tufanon se tu khelegi

tu ne kya khub diya mujh ko mohabbat ka sila
umr bhar main nahin bhulunga mohabbat teri

apne is chahne wale ko diya tu ne fareb
jis ne ki thi sahar-o-sham ibaadat teri

ranj-o-gham mujh ko ata kar ke zamane bhar ke
meri rangin bahaaron ko ujada tu ne

bewafai teri fitrat hai hua ab malum
tir furqat ka mere sine mein gada tu ne