main mohabbat ke sitaron se nikalta hua nur
haq-o-nahaq ke libaadon mein chhupa ek shuur

mere hi dam se hua masjid-o-mandir ka zuhur
main musalman-o-barahman ke iradon ka futur

main haya-zadi-o-khush-nain ke honton ka surur
kisi majbur tawaif ki nigahon ka qusur

meri khwahish thi ki main khud hi zamin par jaun
aur zamin-zad ka khud ja ke main anjam karun

wo zamin-zad ki ehsan-faramosh hai jo
wo zamin-zad ki jo khud hi zamin par utra

aur zamin wo jo wafadar nahin ho sakti
wo zamin jis pe kai khun ke ilzam lage

wo zamin jis ne yahan dekhe hain katte hue sar
wo zamin deti rahi hai jo gunahon ko panah

wo zamin jis ne chhupae hain kai raaz-o-niyaz
sazishen hoti rahin jis pe mohabbat ke khilaf

aur wo chup hai ugalti hi nahin ek bhi lafz
masala ye hai ki ab kis se gawahi mangun