saat-e-khud-gari khud-shanasi
rifaqat mohabbat ke wo jagte qafile

jo mah-o-sal ki gard mein at gae the
ab bhi ek gum-shuda raste par rawan hain

ham-nawai ke wo raat-din
waqt ki gahri andhi

guphaon se uth kar
mere atraf yun jama hone lage hain

jaise mujhe mujh se meri be-hisi ka gila kar rahe hon
puchhte hon

ki kya mausamon ke atal daere
soz-e-dil ki bhi zanjir-e-pa hain

umr-e-rafta ke kis bite lamhe se puchhun
wo bedar raaten

pur-asrar shamen
guhar-bar subhen

wo manus jazbon se sarshaar baaten
jo pas-e-parda-e-dard-e-dil

ab bhi soi nahin hain
waqt ke raste par agar

khuli aankh ka khwab thin
wahima thin

to dil se ufuq tak
ye jalti hui surkh tahrir kyun hai