shahr-e-dil ke khamosh gali-kuchon mein
dukhon ke qafile aa kar thahre hain

hadd-e-nazar udasi ki dhup phaili hai
wafa ke thukrae

sitam-parwar chehron ki bhid mein
mohabbat ki dar-badari ka faisla hua hai

nafraton mein dube kuchh chehre mil ke
ek khush-rang manzar ko

viraniyon ke dasht mein dafn karte hain
safed parindon ki aaankhon mein

ashkon ka samundar undel kar
unhen tanhaiyon ke zindan mein qaid karte hain

aur sitam-gazida lamhon ki baqa ki khatir
sitamgari ke nae silsilon ka ahd karte hain