wafa ke phul khilao bahaar-e-holi hai
nazar nazar se milao bahaar-e-holi hai

hanso to sab ko hansao bahaar-e-holi hai
dilon ki pyas bujhao bahaar-e-holi hai

nazar se dil mein samao bahaar-e-holi hai
gale se sab ko lagao bahaar-e-holi hai

wafa ka rang jamao bahaar-e-holi hai
tarane pyar ke gao bahaar-e-holi hai

na hum se ruth ke jao bahaar-e-holi hai
ab aao laut bhi aao bahaar-e-holi hai

rangon mein rang rachao bahaar-e-holi hai
dilon ka bhed mitao bahaar-e-holi hai

gulal abir udao bahaar-e-holi hai
manao jashn manao bahaar-e-holi hai