ilm se apni shan hai yaro
ilm se apni aan hai yaro

ilm se izzat-e-watan bhi hai
ilm se hurmat-e-chaman bhi hai

ilm hasil hai zindagani ka
ilm hasil hai kaamrani ka

ilm ek shahr hai mohabbat ka
ilm ek desh hai sadaqat ka

ilm ek parcham-e-wafa bhi hai
ilm aaina-e-haya bhi hai

ilm se raushni mili hum ko
ilm se zindagi mili hum ko

ilm se tirgi ko dur karo
kaam achchha hai tum zarur karo

ilm se apna bol-baala hai
sari duniya mein jo ujala hai

ilm ki raushni dikhao unhen
ilm kya chiz hai dikhao unhen

aao mil-jul ke hum padhen yaro
sidhe raste pe hum chalen yaro