hum wo insan hain
jin ki dahshat se sahme hue hain darinde talak

hum wo insan hain
dam-ba-khud jin ke shar se hai shaitan bhi

hum wo insan hain
apne hi khun mein hath jin ke hain lithde hue

hum wo insan hain
dudh pite bilakte hue tifl se bhi jinhen khauf hai

hum wo insan hain
apni wahshat mein jo

masjidon mandiron dars-gahon kalisaon tak ko nahin bakhshte
hum wo insan hain

jo faqat rang aur nasl ke farq par
maslak-o-din ke nam par

khun bahate hain nahaq bade fakhr se
aisi pasti ki daldal mein hum dhans chuke

jis se bahar nikalne ki koi bhi surat nahin
han magar ek rassi to hai

sare mil kar use hum agar tham len
khauf wahshat adawat ki daldal se bahar nikal aaenge

ahd-e-hazir ke insan ke daman par
jitne bhi dagh hain

sare dhul jaenge