is shahr mein ab aaina-samani karo ho tum jis pe azal se hi hukmrani karo ho ek arsa hua kucha-e-jaanan hua viran phir bhi tum isi shahr ki nigarani karo ho phul ugte the jis ja wahin ug aaen hain kante kya aise gulistan ki nigahbani karo ho har baat sar-e-bazm bhala karta hai koi kyun apne hi jazbaat ki uryani karo ho pad jaen hain afkar mein shubhat ki girhen jab baat bhi tum surat-e-yazdani karo ho dikhlao ho ummid ko mauhum si ek lau soe hue jazbaat mein tughyani karo ho dushman pe bhi tum chashm-e-karam rakkho ho apni kis shan se tum us ki bhi mehmani karo ho kya baat hai kyun badle hue rakkho ho tewar kyun mere har ek lafz ko isyani karo ho uth jaen jo is dar se batao to kahan jaen kya faisla haq mein mere irfani karo ho hasti gham-e-dauran mein mita do ho tum apni phir dil ko faqat nazr-e-pashemani karo ho hairan hai ulfat ki is uslub pe 'asra' kya roko ho kahe ki farawani karo ho