kya ajab hai ki kabhi dil ke siyah-khane mein
muskura utthe koi shokh kiran

ye bala-khana-e-tarik munawwar ho jae
tod de apni khamoshi jo zamir

gham ke tah-khanon ke asrar khulen
phir na ehsas chubhoe nashtar

phir na rah rah ke jhinjhode ye zamir
aur sine pe koi bojh bhi baqi na rahe

zehn se fikr ka ambar hate
ek kade dard ka darman ho jae

hae wo dard jo alfaz mein dhalta hi nahin
ek kanta jo kisi tarah nikalta hi nahin